دائرہ » تصاویر

جو جیکسن اور بھتہ

ساجداقبال — Mon, 07 Dec 2009 04:46:49 +0000

بی بی سی والے بھی کبھی کبھی کبھار صحیح لطیفے لگاتے ہیں۔ پچھلے دنوں یہ خبر کئی دنوں تک فن و فنکار صفحے کی زینت بنی رہی۔

آئینے

ساجداقبال — Sun, 25 Jan 2009 13:22:19 +0000

ابنٹو پر میں نے ریموٹ ڈیسکٹاپ کنفیگر کیا، کوئی اور نہ ملا تو خود ہی سے رابطہ جوڑ لیا اور پھر میرے ڈیسک ٹاپ کی حالت کچھ یوں ہوئی:

بلاعنوان

ساجداقبال — Fri, 02 Jan 2009 04:15:29 +0000

پرانا اور نیا سال

ساجداقبال — Thu, 01 Jan 2009 13:42:36 +0000

لیجیے ایک اور نیا سال شروع ہو گیا۔ پچھلے سال تو میں نے فیض کی ایک دل جلی سے نظم شائع کر کے جان چھڑوا لی لیکن اس دفعہ کچھ لمبا لکھنے کا ارادہ ہے۔
پہلے ذکر کچھ پچھلے سال کے سود و زیاں کا۔ پچھلے سال کی سب سے بڑی کامیابی جسے میں قرار دے سکتا ہوں وہ ہے تھوڑی بہت مستقل مزاجی کا حصول۔ اس مستقل مزاجی کو بلاگنگ کے کلیے سے نا چانچیے گا کیونکہ زندگی کے کئی اور پیمانے اس کی گواہی کیلیے موجود ہیں جنکا بنظر خود مشاہدہ کرنے کیلیے آپکو جہاز کا ٹکٹ کٹا کر اسلام آباد آنا ہوگا۔ دوسری اہم کامیابی میرے لیے یہ تھی کہ اس سال میں نے رشتہ داروں سے تعلقات پیوستہ رہ شجر سے زیادہ بڑھ کر اچھے رکھے اور کچھ "متوقع" رشتہ داروں سے تعلقات کی وجہ سے میری منگنی بھی ٹوٹنے سے بچ گئی(اللہ کا شکر)۔ منگنی کے ذکر کے بعد ناکامیوں کا رونا مناسب رہیگا۔ پہلی ناکامی یہ کہ 2008ء میں میرا پکا ارادہ تھا کہ شادی کے بندھن میں بندھ جاؤں لیکن اللہ کو کچھ اور ہی منظور تھا۔ میری سستی اور پلاننگ سے عاری زندگی آڑے آئی اور ہم بیچلر سے بیچارے(شوہر) کی مسافت نہ طے کر سکے۔
معاشی لحاظ سے میرے لیے یہ ملا جلا سال تھا۔ تنخواہ میں صرف ایک مرتبہ اضافہ ہوا لیکن میرے کام(سارا دن خبریں اور بلاگ چاٹنا) کے لحاظ سے ٹھیک ہی تھا۔ معاشی لحاظ سے اسوقت مجھے اپنی قلاشی کا شدت سے احساس ہوا جب سسرال والوں نے مطالبہ کیا کہ کمرہ بنواؤ ورنہ لڑکی کی تصویر دیکھ کر صبر کر لو۔ خیر زندگی کے میں پہلی دفعہ ہم نے ایک بڑا فیصلہ کیا اور کسی قیمت پر کمرہ بنانے کی ٹھان لی۔ تادم تحریر یہ ایک خوشگوار تجربہ(قرضے چھوڑ کر) رہا۔ گو کمرے کی باقیات یعنی قرضے اس سال میرے لیے بڑا چیلنج رہینگے لیکن فیصلے کی طاقت اسوقت میری سب سے بڑی قوت ہے۔ اور ویسے بھی اپنی معاشی پیشنگوئیوں کے مطابق(جو پاکستانی معیشت سے کسی طرح کم نہیں) شادی بھی مجھے قرض کے بار گراں تلے کرنی ہوگی سو یار زندہ صحبت باقی۔ بندہ کہے پہلے سیٹل ہو، کچھ کماؤ پھر شادی کی گل کرو لیکن میرے عزیز!(زونگ) پٹھانوں میں شادی کیلیے اتنی درد سری کی ضرورت نہیں ہوتی۔
2009ء کی پلاننگ تو کچھ اوپر ذکر ہو گیا لیکن پچھلے سال کے سبق یعنی "پلاننگ کرو ورنہ بیٹھ کر روؤ" کو سامنے رکھتے ہوئے اس سال میں سب کچھ نہیں تو کافی کچھ پلاننگ سے کرنا چاہتا ہوں۔ سرفہرست معاشیات ہے۔ اس کے لیے میں نے دو محاذ چنے ہیں۔ نمبر1: گرافک ڈیزائننگ(جھوٹ: جسکا مجھے بچپن سے شوق ہے) کو سنجیدگی سے لینا۔ گو اس پروفیشن کے رموز ازبر کرنے کیلیے میں نے ٹارگٹ جاب کیوجہ سے وقت کی کمی کی بناء پر دو سال رکھا ہے لیکن اگر اس سال میں نے کچھ کر دکھایا تو امید ہے میرا دو سال کا ٹارگٹ بخوبی پورا ہوگا۔
نمبر2: گو امریکی کریڈٹ کرنچ ہر جگہ گُل کھلا رہی ہے لیکن تادم تحریر ویب کمپنیاں خاصی محفوظ ہیں۔ سو اس سال کے آخر تک میں نے اپنی آمدنی میں ویب سے 500 ڈالر اضافہ کرنا ہے۔ گو مقابلے کے اس دور میں یہ خاصا مشکل کام ہے لیکن اب کمر کس ہی لی ہے تو بڑے ٹارگٹ رکھنا ہی پڑینگے۔ اس کے لئے ویب پر میرا پرائمری فوکس انگریزی بلاگنگ پر ہوگا۔
معاشی کے بعد کچھ ذاتی زندگی، اس سال پکا ارادہ ہے کہ ان شاء اللہ شادی کرونگا۔ گو اسوقت میں کوئی مخصوص تاریخ دینے کی پوزیشن میں نہیں لیکن میری کوشش ہوگی کہ جتنی جلد ہو سکے اس فریضے سے سبکدوش ہوں۔(ورنہ حالیہ شادی شدہ آفتاب طعنے دے دے کر میرا جینا حرام کر دیگا)۔ اس سال بھی ارادہ ہے کہ ان شاء اللہ رشتہ داروں سے اچھے تعلقات برقرار رکھوں اور انہیں مزید مضبوط کروں۔
ایک اور ضروری کام جو اس سال کرنا ہے وہ ہے صحت کی بہتری۔ 2008ء کے آخر میں گو صحت کا لیول ایک جگہ برقرار رہا اور کمزوری کیطرف رجحان کم ہی رہا لیکن اصل چیلنج ایک نارمل صحت کا حصول ہے، جو اوپر بیان کیے گئے سارے ماؤنٹ ایورسٹس سر کرنے کیلیے انتہائی ضروری ہے۔ لمبی جاب ٹائمنگ اور نیند کے لیے کم ٹائم کیوجہ سے گو جم یا پارک جانا مشکل ہے لیکن کوشش کرونگا کہ یوٹیوب سے کچھ ان ڈور ورزشیں سیکھ کر اپنا سکوں۔
ارادے تو اور بھی بہت سارے ہیں لیکن یہ وہ خاص سنگ میل ہیں جنکا حصول اس نئے سال میں میرا ہدف ہیں۔ اگر میں ان میں سے آدھے کے آدھے بھی سر کرنے میں کامیاب رہا تو بہت بڑی بات ہوگی۔ رب کریم ان اہداف کے حصول میں میری نصرت اور رہنمائی فرمائے۔ اٰمین ثم اٰمین
آپ بتانا پسند کرینگے کہ نئے سال کیلیے آپکے کیا اہداف ہیں؟

بیوروکریسی

ساجداقبال — Fri, 14 Nov 2008 03:29:28 +0000

پاکستانی بیوروکریسی کی حد تک بالکل صحیح۔
مزید تصاویر یہاں

میمونہ، میری پیاری بھتیجی

ساجداقبال — Sun, 10 Aug 2008 08:25:20 +0000

میمونہ میرے بڑے بھائی کی سب سے چھوٹی بیٹی ہے۔ عمر ابھی 2 سال سے کم ہے لیکن ماشاء اللہ سے انتہائی سمجھدار ہے۔ بچپن ہی سے بہت کم روتی ہے بلکہ اگر کوئی جھڑکے تو رونے کا ناٹک کرتی ہے۔ سوتے وقت اگر کوئی پاس نہ ہو تو خود کو تھپکتے سو جاتی ہے۔ کافی ساری چیزوں کے نام کہنے پر سمجھ جاتی ہے۔ میمونہ کی ایک عادت ہے کہ اگر وہ اچھی طرح پانی پی لے لیکن اگر کوئی اور پی رہا ہو تو اس سے پھر مانگ کر پئے گی۔ اللہ اسے اپنے حفظ و امان میں رکھے۔ اٰمین

کوہاٹ تصاویر کے آئینے میں

ساجداقبال — Thu, 03 Jul 2008 07:03:39 +0000

یہ اصل میں ایک فورم کی تحریر تھی جو میں نے کوہاٹ کی تصاویر اکٹھی کرکے لکھی تھی۔ یہاں مکرر پیش کر رہا ہوں۔

کوہاٹ صوبہ سرحد کے جنوبی حصہ میں واقع ہے۔ کوہاٹ کے بارے میں آپ وکیپیڈیا پر یہاں‌ اور کوہاٹ کے تاریخ پر کتاب ”کوہاٹ تاریخ کے آئینے میں“ یہاں پڑھ سکتے ہیں۔ سردست میں کوہاٹ کی سیر آپکو تصاویر کے ذریعے کرواؤنگا۔
(فلکر کی ”نعمت“ سے محروم ملکوں والے دوستوں سے معذرت)

ذریعہ
یہ کوہاٹ کے مین بازار سے متصل فروٹ مارکیٹ۔ پھلوں‌ کی افزائشی علاقوں کو چھوڑ کر یہاں آپکو دعوے سے سب سی سستی قیمتوں پر پھل ملیں گے۔

ذریعہ
کوہاٹ کی ”دوستی ٹنل“ جو جاپان کی مدد سے تعمیر کی گئی۔ ٹنل کی بدولت درہ آدم خیل کا 50 منٹ کا فاصلہ اب 5 منٹ میں طے ہو جاتا ہے۔‌کوہاٹ ٹنل کے بارے میں مزید

ذریعہ
ٹنل کا اندرونی منظر۔ کوہاٹ‌ ٹنل ہر لحاظ سے ایک عالمی معیار کی ٹنل ہے۔ ہم پہلے اللہ اور پھر جاپان کے شکرگزار ہیں۔

ذریعہ
پرانی انڈس ہائے وے، یہ گیٹ درہ آدم خیل کے حدود کے خاتمے اور کوہاٹ کی آمد کا اعلان کرتا ہے۔ تاہم ٹنل بن جانے کے بعد یہ سڑک تقریباً متروک ہو چکی ہے۔ یہ گیٹ‌ برٹش دور کی یادگار ہے۔

درہ آدم خیل کا زکر آگیا تو ایک جھلک ضرور دیکھیں۔ درہ آدم خیل اور دیگر کئی قبائلی علاقے ایف آر کوہاٹ‌ کے تحت آتے ہیں۔ باقاعدہ کوہاٹ ضلع کا حصہ تو نہیں لیکن ایڈمنسٹریشن یہی سے ہوتی ہے۔

ذریعہ
کوہاٹ کینٹ میں نصب گھوڑوں‌ کا مجسمہ۔ کوہاٹ کینٹ‌ انگریز دور سے ہی بڑی اہمیت کا حامل ہے۔ کیونکہ کوہاٹ کے آس پاس قبائلی علاقے واقع ہیں۔

ذریعہ
کینٹ میں نصب عجب خان آفریدی کا مجسمہ۔ درہ آدم خیل سے تعلق رکھنے والے اس حریت پسند کا کوہاٹ‌کی تاریخ‌ میں‌ لازوال کردار ہے۔ اچھے وقت میں لالی ووڈ اور پشتو انڈسٹری نے انکے متعلق فلمیں بھی بنائی تھیں۔

ذریعہ
تاندہ، کوہاٹ کا سب سے بڑا ڈیم ہے۔ کوہاٹ‌ کی زیادہ زرخیز زمینیں‌ اسی ڈیم اور اسکی نہروں کے گرد واقع ہیں۔

ذریعہ
گھمگھول شریف کا مزار۔ کوہاٹ‌ میں‌ چونکہ لوگ پیروں کو زیادہ لفٹ‌ نہیں کراتے اسلئے زیادہ زائرین کی تعداد پنجاب کے علاقوں سے ہوتی ہے۔

ذریعہ
توغبالا کے مقام پر واقع کیڈٹ کالج کوہاٹ، کوہاٹ‌ کے قدیم تعلیمی اداروں میں‌ سے ایک ہے۔ کالج کے بالکل سے سامنے والی سڑک علاقہ غیر جاتی ہے، جو منشیات کی سمگلنگ کیلیے بدنام ہے۔

ذریعہ
امرود بیچتے بچے۔ کوہاٹ کا پانی اور امرود بہت مشہور ہیں۔ ناقدین لاڑکانہ کے امرودوں کو بہتر قرار دیتے ہیں۔

ذریعہ
کوہاٹ کے جڑواں‌ علاقے جنگل خیل میں واقع چشمے۔ گرمیوں‌ میں قریبی علاقوں سے بچے نہانے یہاں‌ آتے ہیں۔

اگلی دفعہ ان شاء اللہ کوشش کرونگا کہ خود سے تصاویر کھینچ کر پیش کروں۔