دائرہ » ٹیگ

دو اور دو؟ اور دو

ساجداقبال — Sat, 10 Jan 2009 15:46:29 +0000

عمار نے ٹیگ کیا تھا، جوابات حاضر ہیں۔

چار جگہیں جہاں میں بار بار جاتا ہوں

گھر
آفس
ایف ٹین مرکز
روٹی والی دکان

چار لوگ جن سے باقاعدہ ملتا ہوں، گھر والوں کے علاوہ

دفتر کے ساتھی
روٹی والا
میری سائیکل
فریج

کھانے کی پسندیدہ چار جگہیں

سیور
میرے دوست نوید کا گھر
آفس(اگھر اچھا ہو تو)
گاؤں کے چھولے والے(گو آجکل کم جانا ہوتا ہے)

چار جگہیں جہاں میں ہونا چاہوں

نیوزی لینڈ
اپنے گاؤں
"اُنکے" گاؤں
اللہ میاں کو دیکھنے

چار پسندیدہ ٹی وی پروگرام

گو ٹی وی کم دیکھتا ہوں لیکن
میرے مطابق
ڈسکوری کی ڈاکیومینٹریز
سٹار موویز پر کوئی اچھی فلم
چینلز گھماتے جو اچھا مل جائے

چار فلمیں جو بار بار دیکھنا چاہوں

پائریٹس آف کیریبئین(تمام حصے)
ٹرائے
امریکن بیوٹی(کیون سپیسے کی مسکراہٹ پسند ہے)
بلڈ ڈائمنڈ(افریقہ کے متعلق تمام موویز پسند ہیں)

میرا نہیں خیال کوئی اب ٹیگنے کیلیے بچا ہے۔ بہتر ہے اسے یہاں ختم کر دیا جائے۔

پرانا اور نیا سال

ساجداقبال — Thu, 01 Jan 2009 13:42:36 +0000

لیجیے ایک اور نیا سال شروع ہو گیا۔ پچھلے سال تو میں نے فیض کی ایک دل جلی سے نظم شائع کر کے جان چھڑوا لی لیکن اس دفعہ کچھ لمبا لکھنے کا ارادہ ہے۔
پہلے ذکر کچھ پچھلے سال کے سود و زیاں کا۔ پچھلے سال کی سب سے بڑی کامیابی جسے میں قرار دے سکتا ہوں وہ ہے تھوڑی بہت مستقل مزاجی کا حصول۔ اس مستقل مزاجی کو بلاگنگ کے کلیے سے نا چانچیے گا کیونکہ زندگی کے کئی اور پیمانے اس کی گواہی کیلیے موجود ہیں جنکا بنظر خود مشاہدہ کرنے کیلیے آپکو جہاز کا ٹکٹ کٹا کر اسلام آباد آنا ہوگا۔ دوسری اہم کامیابی میرے لیے یہ تھی کہ اس سال میں نے رشتہ داروں سے تعلقات پیوستہ رہ شجر سے زیادہ بڑھ کر اچھے رکھے اور کچھ "متوقع" رشتہ داروں سے تعلقات کی وجہ سے میری منگنی بھی ٹوٹنے سے بچ گئی(اللہ کا شکر)۔ منگنی کے ذکر کے بعد ناکامیوں کا رونا مناسب رہیگا۔ پہلی ناکامی یہ کہ 2008ء میں میرا پکا ارادہ تھا کہ شادی کے بندھن میں بندھ جاؤں لیکن اللہ کو کچھ اور ہی منظور تھا۔ میری سستی اور پلاننگ سے عاری زندگی آڑے آئی اور ہم بیچلر سے بیچارے(شوہر) کی مسافت نہ طے کر سکے۔
معاشی لحاظ سے میرے لیے یہ ملا جلا سال تھا۔ تنخواہ میں صرف ایک مرتبہ اضافہ ہوا لیکن میرے کام(سارا دن خبریں اور بلاگ چاٹنا) کے لحاظ سے ٹھیک ہی تھا۔ معاشی لحاظ سے اسوقت مجھے اپنی قلاشی کا شدت سے احساس ہوا جب سسرال والوں نے مطالبہ کیا کہ کمرہ بنواؤ ورنہ لڑکی کی تصویر دیکھ کر صبر کر لو۔ خیر زندگی کے میں پہلی دفعہ ہم نے ایک بڑا فیصلہ کیا اور کسی قیمت پر کمرہ بنانے کی ٹھان لی۔ تادم تحریر یہ ایک خوشگوار تجربہ(قرضے چھوڑ کر) رہا۔ گو کمرے کی باقیات یعنی قرضے اس سال میرے لیے بڑا چیلنج رہینگے لیکن فیصلے کی طاقت اسوقت میری سب سے بڑی قوت ہے۔ اور ویسے بھی اپنی معاشی پیشنگوئیوں کے مطابق(جو پاکستانی معیشت سے کسی طرح کم نہیں) شادی بھی مجھے قرض کے بار گراں تلے کرنی ہوگی سو یار زندہ صحبت باقی۔ بندہ کہے پہلے سیٹل ہو، کچھ کماؤ پھر شادی کی گل کرو لیکن میرے عزیز!(زونگ) پٹھانوں میں شادی کیلیے اتنی درد سری کی ضرورت نہیں ہوتی۔
2009ء کی پلاننگ تو کچھ اوپر ذکر ہو گیا لیکن پچھلے سال کے سبق یعنی "پلاننگ کرو ورنہ بیٹھ کر روؤ" کو سامنے رکھتے ہوئے اس سال میں سب کچھ نہیں تو کافی کچھ پلاننگ سے کرنا چاہتا ہوں۔ سرفہرست معاشیات ہے۔ اس کے لیے میں نے دو محاذ چنے ہیں۔ نمبر1: گرافک ڈیزائننگ(جھوٹ: جسکا مجھے بچپن سے شوق ہے) کو سنجیدگی سے لینا۔ گو اس پروفیشن کے رموز ازبر کرنے کیلیے میں نے ٹارگٹ جاب کیوجہ سے وقت کی کمی کی بناء پر دو سال رکھا ہے لیکن اگر اس سال میں نے کچھ کر دکھایا تو امید ہے میرا دو سال کا ٹارگٹ بخوبی پورا ہوگا۔
نمبر2: گو امریکی کریڈٹ کرنچ ہر جگہ گُل کھلا رہی ہے لیکن تادم تحریر ویب کمپنیاں خاصی محفوظ ہیں۔ سو اس سال کے آخر تک میں نے اپنی آمدنی میں ویب سے 500 ڈالر اضافہ کرنا ہے۔ گو مقابلے کے اس دور میں یہ خاصا مشکل کام ہے لیکن اب کمر کس ہی لی ہے تو بڑے ٹارگٹ رکھنا ہی پڑینگے۔ اس کے لئے ویب پر میرا پرائمری فوکس انگریزی بلاگنگ پر ہوگا۔
معاشی کے بعد کچھ ذاتی زندگی، اس سال پکا ارادہ ہے کہ ان شاء اللہ شادی کرونگا۔ گو اسوقت میں کوئی مخصوص تاریخ دینے کی پوزیشن میں نہیں لیکن میری کوشش ہوگی کہ جتنی جلد ہو سکے اس فریضے سے سبکدوش ہوں۔(ورنہ حالیہ شادی شدہ آفتاب طعنے دے دے کر میرا جینا حرام کر دیگا)۔ اس سال بھی ارادہ ہے کہ ان شاء اللہ رشتہ داروں سے اچھے تعلقات برقرار رکھوں اور انہیں مزید مضبوط کروں۔
ایک اور ضروری کام جو اس سال کرنا ہے وہ ہے صحت کی بہتری۔ 2008ء کے آخر میں گو صحت کا لیول ایک جگہ برقرار رہا اور کمزوری کیطرف رجحان کم ہی رہا لیکن اصل چیلنج ایک نارمل صحت کا حصول ہے، جو اوپر بیان کیے گئے سارے ماؤنٹ ایورسٹس سر کرنے کیلیے انتہائی ضروری ہے۔ لمبی جاب ٹائمنگ اور نیند کے لیے کم ٹائم کیوجہ سے گو جم یا پارک جانا مشکل ہے لیکن کوشش کرونگا کہ یوٹیوب سے کچھ ان ڈور ورزشیں سیکھ کر اپنا سکوں۔
ارادے تو اور بھی بہت سارے ہیں لیکن یہ وہ خاص سنگ میل ہیں جنکا حصول اس نئے سال میں میرا ہدف ہیں۔ اگر میں ان میں سے آدھے کے آدھے بھی سر کرنے میں کامیاب رہا تو بہت بڑی بات ہوگی۔ رب کریم ان اہداف کے حصول میں میری نصرت اور رہنمائی فرمائے۔ اٰمین ثم اٰمین
آپ بتانا پسند کرینگے کہ نئے سال کیلیے آپکے کیا اہداف ہیں؟

ٹیگ: عید نامہ

ساجداقبال — Sat, 06 Dec 2008 08:15:10 +0000

پاکستان میں ان شاء اللہ بروز منگل عیدالاضحٰی منائی جائیگی، غالباً کافی سارے ممالک ہم سے ایک دن پہلے یعنی بروز پیر سعودی عرب کے ہمراہ عید منائیں گے۔ ہر ملک، صوبے، علاقے میں عید منانے کے الگ الگ انداز ہیں۔ اس عید پر سوچا کیوں نہ یہ جانا جائے کہ آپکے علاقے میں عید کس طرح منائی جاتی ہے۔ کہیں ایسا تو نہیں کہ آپکے علاقے میں جانور کی پہلی ٹانگیں کاٹی جاتی ہوں (کہ بھاگ نہ جائے)۔ P:۔ تو جناب اس ٹیگ کے کھیل میں آپ نے کرنا یہ ہے کہ اپنے ہاں عیدالاضحٰی منانے کے طور طریقوں کا آپ نے ذکر کرنا ہے اور اگر باتصویر ہو تو کیا ہی بات ہے۔ بیشک ماٹھے اردو اخباروں کیطرح کسی بچے کی تصویر لگا کر کیپشن لکھ دیں کہ ''کراچی میں عید منانے کا انداز''۔ دو باتوں کا خیال رکھنا ہے کہ موضوع پر تنوع کیلیے اپنے علاقے سے ہٹ کر بلاگرز کو ٹیگ کریں اور دوسرے ایک ہفتے کے اندر اندر اپنی تحریر لکھ دیں، یہ نہ ہو کہ عید کا کھایا پیا ہضم کر کے تین ہفتے بعد خالی پیٹ تحریر لکھ رہے ہوں۔ اور ہاں آپکے لیے عید آفر کہ صرف اور صرف دو بلاگرز کو ٹیگ کرنا ہے۔
میں ٹیگ کرونگا ابوشامل کو تاکہ مجھے معلوم ہو کہ کراچی میں عید کس انداز کی ہوتی ہے، شاید لگے ہاتھوں وہ اندرون سندھ کی عید کہانی بھی سُنا دیں۔ دوسرا ٹیگ فرحت کیانی، وہ بتائیں کہ لندن میں عید کیسے ہوتی ہے (اگر تادم تحریر وہ وہیں ہیں)۔ اور ہاں جو بھائی/بہن پڑھیں، ٹیگ کے انتظار میں نہ رہیں بلکہ اپنی تحریر موقع ملتے ہیں لکھ ماریں۔
میں عید کے چوتھے پانچویں روز لکھوں گا ۔ ۔ ۔ اب گیند آپکے کورٹ میں۔

ہم کو کس نے ٹیگ مارا؟؟؟

ساجداقبال — Mon, 16 Jun 2008 09:36:57 +0000

یہ کہانی پھر سہی۔۔۔ لیکن فی الحال ان سوالوں کے جواب جو جہانزیب نے شروع کیے اور رضوان بھائی سے ہوتے ہوئے ہماری طرف آپہنچے۔
اِس وقت آپ نے کِس رنگ کی جرابیں پہنی ہوئی ہیں؟

میں سرما کے چند مہینے چھوڑ کر بالکل جراب نہیں پہنتا اور اس گرمی میں تو سوال ہی نہیں پیدا ہوتا۔

کیا آپ اس وقت کچھ سُن رہنے ہیں؟ اگر ہاں تو کیا؟

کچھ نہیں، بس ہمارے بلڈنگ کے سینٹرل کولنگ سسٹم کا شور ہی سنائی دے رہا ہے۔

سب سے آخری چیز جو آپ نے کھائی تھی کیا تھی؟

ڈیری ملک کی چاکلیٹ۔

سب سے آخری فلم کونسی دیکھی ہے؟

Behind the enemy lines پہلے والی۔

آپ کا پسندیدہ قول کیا ہے؟

ایک معاشرہ کفر کے ساتھ تو باقی رہ سکتا ہے بے انصافی کے ساتھ نہیں۔ حضرت علی رضی اللہ عنہ۔(اللہ کمی بیشی معاف کرے۔)

کل رات بارہ بجے آپ کیا کر رہے تھے؟

سو رہا تھا، کھانا نہیں پکانا تھا سو جلدی سو گیا۔ کبھی کبھار ہی ہوتا ہے یہ مزہ۔

کِس مشہور شخصیت زندہ یا مردہ سے آپ مِلنا چاہیں گے؟

حضرت عمرفاروق رضی اللہ عنہ۔

غصہ میں اپنے آپ کو پرسکون کِس طرح کرتے ہیں؟

عجیب بات ہے میرا غصہ اکثر کنٹرولڈ ہوتا ہے۔

فون پر سب سے آخر میں کِس سے بات ہوئی؟

ایک سابقہ کولیگ عمادالحق سے۔

آپ کا پسندیدہ تہوار کونسا ہے؟

عیدالفطر۔ دوستوں، رشتہ داروں اور گاؤں والوں سے ملکر خوشی ہوتی ہے۔

میں انہی سوالات کے جوابات شاکر، شگفتہ، زینب، شوبی اور وارث بھائی سے چاہوں گا۔
اپڈیٹ: میں نے اپنے تمام نامزد بلاگرز کا بذریعہ آراء مطلع کر دیا سوائے شاکر کے، کہ اسکا بلاگ ہی غائب ہے۔ اب جوابات کا انتظار ہے۔